Orges Shehi është trajneri i ri i Kukësit. Lajmi u bë i ditur nga klubi i Kukësit, i cili njoftoi se Shehi ka firmosur një kontratë që do të zgjasë deri në vitin 2021.
Sipas klubit, Shehi në karrierën e tij futbollistike ka arritur të fitojë trofe të shumtë me Skënderbeun si edhe numëron paraqitje në grupet e Ligës së Europës.
“Klubi i Kukësit njofton se ka arritur marrëveshjen me trajnerin Orges Shehi për të marrë drejtimin e skuadrës. Pas bisedimeve që klubi ka pasur me teknikun, është gjetur gjuha e përbashkët dhe Shehi ka firmosur me Kukësin deri në verën e vitit 2021! Në ambientet e “Air Albania”, Shehi është prezantuar nga administratori Lavdrim Gjici dhe drejtori sportiv, Nderim Nexhipi. Shehi në karrierën e tij futbollistike ka arritur të fitojë trofe të shumtë me Skënderbeun si edhe numëron paraqitje në grupet e Ligës së Europës. Aventura si trajner nisi një vit më parë, kur për një sezon drejtoi skuadrën e Skënderbeut. Klubi i uron Shehit mirëseardhje dhe suksese në krye të stolit të Kukësit”, lexohet në njoftimin e Kukësit.
Ndërsa, Shehi deklaroi se e zgjodhi Kukësin sepse është një skuadër e madhe, teksa e cilësoi këtë si një arritje personale.
“Suksesi është i rëndësishëm për një trajner. E zgjodha Kukësin sepse është një skuadër e madhe. Është arritje personale. Me shtyu cilësia e klubit dhe lojtarit. Është e rëndësishme të kesh grupin. Kam qenë pa skuadër këto kohë, isha si analist në një studio dhe e kam ndjekur Kukësin”, tha Shehi./Opinion.al
