Edmond Daliu nga Tirana, është drejtuar në redaksinë e emisionit “Stop” në Tv Klan për një konflikt me vëllain e tij.
Ata janë bashkëpronarë të së njëjtës shtëpi, ku janë edhe dy fëmijë të tjerë dhe Edmondi ka bërë dhe një shtesë ngjitur me këtë shtëpi, në të cilin është pronari i vetëm. Pasi kthehet nga Italia, ku qëndroi tre muaj tek e bija, e gjen shtëpinë të kthyer në dyqan.
Shkoi në polici, por i thanë që t’i drejtohet gjykatës. Për të jetuar shkoi te një miku i tij. Në vitin 2015, dy nga bashkëpronarët, Leonardi dhe Alma, iu drejtuan Gjykatës së Shkallës së Parë për pjesëtimin e pasurisë së paluajtshme. Me arsyetimin, se jetojnë në banesë gjykata u dha të drejtë të mbajnë shtëpinë dhe të kompensojnë Edmondin dhe motrën tjetër.
“Përshëndetje unë jam Edmond Daliu dhe kam një problem me vëllain dhe me kunatën. Kemi një banesë të përbashkët në zonë ‘Myslym Shyri’, ku unë kam më shumë se gjysmën e shtëpisë. Jemi bashkëpronarë në një pjesë, nevoja e strehimit dhe si gjithë banorët e pallatit unë kam bërë një shtesë në vitin 2005, kam edhe certifikatën e pronësisë. Bashkëpronarët e tjerë, prej 20 vitesh nuk jetojnë më në atë shtëpi sepse kanë shtëpitë e veta. Unë nuk munda që të blej një shtëpi dhe mendova që të ndërtoja atë shtesën, do të ishte e mjaftueshme për mua, meqë unë jetoj vetëm. Problemi qëndron që unë banoja aty dhe në vitin 2010, kur shkova në Itali për të parë vajzën dhe kur u ktheva e gjeta shtëpinë e kthyer në dyqan, me qepena nga kunata ime. Shkova në polici dhe ata më thanë që unë t’i drejtohem gjykatës. Që prej vitit 2010 me ndihmën e familjes dhe të një mikut tim u strehova me qira për shumë vite”, rrëfen denoncuesi.
Vendimi mori formë të prerë një ditë më vonë. Edmondi nuk kishte dijeni për këtë, ndaj dhe i kaloi afati i ankimimit. Në këtë pikë ai kërkoi në Gjykatën e Shkallës së Parë rivendosjen në afat, për ta ankimuar dhe kjo kërkesë u pranua edhe në Apel. Prej 2018-ës pret vendimin e Gjykatës së Lartë. Sot Edmondi pret drejtësinë i vetmuar, i sëmurë dhe i pastrehë.
“Në Gjykatë të Lartë ka që në vitin 2018. Ata pretendojnë se do e blejnë të gjithë shtëpinë. Tani unë në pritje të vendimit të gjykatave, dola në pension dhe jam me pension minimal. Nuk mund ta përballoj dot jetën që edhe të marrësh shtëpi me qira edhe të jetosh. Kam më shumë se një vit që jetoj këtu në rrugën “Myslym Shyri” në një ish-garazh të përshtatur për magazinë, që e ka një miku im. Më ka strehuar derisa të zgjidh problemin. Çështja më është bërë urgjente sepse jam prekur nga një sëmundje, nga më të këqijat, nga Parkinsoni. Shpresoj që emisioni “Stop” të sensibilizojë një nga plagët më të mëdha që ka shoqëria jonë, që janë konfliktet brenda gjirit të familjes, për pjesën e pronave”, shton më tej Edmond Daliu.
Vëllai zaptues, Leonardi, nuk pranoi të sqaronte situatën.
Gazetarja: Zoti Leonard përshëndetje. Jam gazetare nga emisioni “Stop” dhe ju telefonoj për një problematikë pronësie që keni me vëllain, do të doja që të takoheshim dhe të bisedonim nga afër. Si e keni mundësinë?
Leonard Daliu: Mos u merr me këto gjëra! Me ato merret gjykata… budallaçkë!
Avokati Arben LLangozi shpjegon, se duhet, që qytetari të hyjë në shtëpinë e tij pasi nuk ka një vendim të formës së prerë që e pengon.
“Deri në këto momente ku shtetas gëzon gjithë të drejtat për ta poseduar këtë pasuri. Unë vlerësoj referuar Kushtetutës së Republikës së Shqipërisë se kemi të garantuar paprekshmërinë e banesës, pore referuar Kodit Penal kemi mangësi referuar dhunimit të pronës. Nëse një person mban padrejtësisht pronën nuk mundet që Kodi Penal të mos e ndëshkojë. Vetë fakti që një person mban në mënyrë të pa drejtë peng banesën do të thotë që kemi dhunim të pronës, duke e keqpërdorur dhe duke e keqtrajtuar. Unë vlerësoj që ky shtetas duhet të gëzojë banesën e vet dhe autorët që e kanë në posedim në mënyrë të paligjshme duhet të mbajnë përgjegjësi”, tha avokati./tvklan.al
