Ledion Lici nga qyteti i Gjirokastrës tregon, se i ka shitur qumështin e deleve të tij një baxhoje në Gjirokastër, të cilën e zotëron Drini Peta.
“Unë si fermer kërkoja baxho për qumështin tim për ta shitur dhe gjeta një baxho në Tepelenë. Ky personi i baxhos quhet Drin Peti”, tha Ledioni.
Ata kishin rënë dakord që në datën 5 të çdo muaji, Ledioni do merrte lekët. Por që nga muaji Mars Ledioni nuk i ka marrë paratë, që shkojnë 2 milionë e 550 mijë lekë të vjetra.
“Drinit i kam çuar qumësht 4 muaj. Në muajin e parë më ka dhënë vetëm 500 mijë Lekë. Në muajt e tjerë e ka shtyrë, e ka shtyrë dhe nuk më ka dhënë lekët. Totali i lekëve është 2 milionë e 550 mijë Lekë. Katër muaj qumësht ia kam dorëzuar atij. Muhabetin e bëmë që lekët do jepeshin në fund të muajit. Në datën 5 unë merrja lekët gjithmonë. Unë e besova dhe ia dorëzova prapë qumështin se nuk kisha ku ta çoja. Këtë punishte e kam furnizuar me qumësht deleje. Qumështin e kam shitur me 1 mijë Lekë litrin”, u shpreh i riu.
Vetë qytetari është drejtuar tek pronari i baxhos në muajin Shtator, pasi ishin bërë 6 muaj, pa marrë paratë e tij, por nga pronari i thuhet, se do t’ia kthejë të hollat për një muaj, pasi ka patur vështirësi.
Denoncuesi: Si do vejë puna e lekëve?
Pronari: E s’ti jap…
Denoncuesi: Fare?
Pronari: (Qesh) Po si s’do t’i jap?! Pupupu vetëm atë s’e bëj dot.
Denoncuesi: Po kur? Vajtën 6 muaj.
Pronari: Dobët shumë puna. Tani më kanë bllokuar dhe punën e licencës. Ra pandemia, mbylla lokalin nja 5-6 muaj. Kur u sëmura, ika fare. Shumë lekë vajti dhe tani mezi e riciklojmë. Po ke frikë se do humbasësh lekët, të bëjë vëllai me noteri, të të jap dhe një lekë interes. Nuk jam unë nga ata.
Denoncuesi: Po ti the, mbaron 30 ditëshi, në datën 5 ke lekët. Hajd se prita nga data 30 deri në datën 5, prita 5 ditë. Po jo 6 muaj.
Pronari: Menduam, se do ecte shitja si kur filloi, që erdhën emigrantët. Kishim cikë shitje, cikë punë. U pre prapë. Muaji, që jemi, do jetë muaji, që do t’i mbyll.
Pas një muaji përsëritet i njëjti premtim duke ndryshuar afati. Paratë do të jepen në 25 Dhjetor.
Denoncuesi: Fjalën që na dhe s’e mbajte. Vajte 1 muaj e 10 ditë afërsisht.
Pronari: Vajti goxha. Në 27, sa ishte atë ditë.
Shoqëruesi: Në 27 the, që do ia japësh lekët ccunit. Unë s’pres dot më. Më ka vajt atje ku s’duhet.
Pronari: Po, e di. Tani është kohë e vështirë shumë.
Shoqëruesi: Ti e ke vetë fajin, se na the…Ne të thamë sa…
Pronari: Nga kënaqësia. Pa mund të thoja hajdeni në fund të vitit edhe do ishim zënë atë dite e do ishte harruar.
Shoqëruesi: Tani realen na doli, që na dole nga llafi. Na thuaj datën, o vëlla!
Pronari: Unë të them datën. Brenda sezonit do mbarojë kjo punë.
Shoqëruesi: Brenda sezonit, që i bie në fund të vitit.
Pronari: I bie në 20-25 Dhjetor, se nga 25 s’punon më njeri.
Por sërish Ledioni nuk i merr dot paratë, që i takojnë./ Tv Klan
