Ka rezultuar negativ në testin e parë për koronavirus zyrtari i Ministrisë së Integrimit Evropian të Kosovës, i cili edhe është bërë shkas për vetizolimin e kryeministrit në detyrë, Albin Kurti, dhe të stafit të ngushtë të tij.
“Që nga nesër do të rifillojmë punën, duke pasur kujdes edhe më të shtuar për mënyrën se si ndërveprojmë dhe vëmendje për higjienën tonë, me qëllim të zbatimit të udhëzimeve nga institucionet shëndetësore”, ka thënë zëdhënësi i Qeverisë në detyrë të Kosovës, Përparim Kryeziu për Radion Evropa e Lirë.
Kryeziu ka thënë se Kurti dhe stafi i tij do të dalin në punë nga dita e martë.
Kryeministri në detyrë i Kosovës, Albin Kurti, ministri në detyrë i Integrimit Evropian, Blerim Reka, dhe kabineti i tij janë futur në vetizolim, pasi një zyrtar i kësaj ministrie ka pasur kontakt të ngushtë me një person që ka rezultuar pozitiv në testin për koronavirus. Vetë kryeministri në detyrë, Albin Kurti, gjatë ditës së hënë, ka njoftuar se nuk ka shkuar në zyrën e tij. /Opinion.al
