Shtatë persona të lënduar, mes tyre edhe fëmijë. Ky është bilanci i një zjarri që shpërtheu rreth mesnatës në një ndërtesë në Rimini dhe flakët nga kati i parë arritën shpejt në banesën e katit të dytë, banuar nga një familje shqiptare.
Kur shtëpia u përfshi nga flakët, shtatë personat e familjes, përfshirë fëmijë janë hedhur nga dritarja. Sipas mediave italiane, zjarri shpërtheu brenda një banese të pabanuar, në katin e parë të një ndërtese në Via Cagnacci.
Në familjen shqiptare që banonte në katin e dytë, jetonin mamaja, babai, katër fëmijë dhe xhaxhai.
Para ardhjes së zjarrfikësve, ishin fqinjët ata që për të shpëtuar fëmijët kanë përdorur dyshekë e batanije duke i hedhur nga tarracat.
Pasojat më të rënda janë për një nga fëmijët e familjes, 7 vjeç dhe nëna 31 vjeçare.
Në spital janë dërguar edhe babai 40 vjeçar, njëri nga fëmijët e tyre vetëm 3 muajsh, dhe dy fëmijët e tjerë 8 dhe 4 vjeç.
Ndërsa xhaxhai i tyre 30 vjeç ka marrë dëmtime të lehta.
Nën hetim për shkaqet e zjarrit, apartamenti i katit të parë është shpallur i papërdorshëm.
