Nuk ka nisur aspak mirë sezoni për Mërgim Mavrajn dhe Hamburgun e tij, që ditën e djeshme kanë pësuar një humbje të turpshme, që përkthehet në eliminim nga Kupa e Gjermanisë.
As numri 5 mbi shpatulla, që vite më parë e ka mbajtur legjenda e futbollit Franc Bekenbauer, nuk mjaftoi që Mavraj të bënte diçka për të shmangur këtë disfatë. Ditën e djeshme, për herë të parë në mënyrë zyrtare, mbrojtësi i Kombëtares shqiptare ka mbajtur numrin 5 te Hamburgu.
Sezonin e kaluar kishte 13-tën, por me ndryshimet që ndodhën e mori ai këtë numër domethënës. Pavarësisht se shqiptari bëri detyrën e tij në fushë, Hamburgu u eliminua nga skuadra e Ligës së tretë Gjermane, Osnabruk, e cila fitoi me rezultatin 3-1.
Ky rezultat ishte surprizë në Kupën e Gjermanisë, sepse thuajse të gjitha ekipet e tjera të mëdha siguruan kualifikimin për në raundin e 1/16-ave. Kjo humbje i ka rebeluar tifozët e Hamburgut që shpërthyen në rrjetet sociale.
