Gjendemi sërish në një periudhë të vitit kur fajësojmë “Mërkurin në prapavijë” për gjithçka që nuk shkon sipas planit.
Por si gjithnjë, astrologia Chrysanthi Kalogeri këshillon në programin “Shije Shtëpie” në Tv Klan që të mos e humbasim toruan sepse thjesht bëhet shkas që diçka të ndodhë.
Si gjithnjë, ajo këshillon t’i marrim anën e mirë Mërkurit për të zgjidhur çfarë nuk kemi arritur të bëjmë më parë.
Chrysanthi Kalogeri: Mërkuri është lajmi kryesor për javën që flasim, 14-21, është aspekti kryesor që Mërkuri kthehet në prapavijë në shenjën e Luanit. Jo se nuk është i rëndësishëm, rikthimi i një planeti në prapavijë, por kjo është shumë e natyrshme, ndodh 3-4 herë në vit me Mërkurin. Mërkuri asnjëherë nuk sjell gjëra fatale, shumë të vështira, të bëhet shkas, kemi një aspekt planetar të vështirë dhe Mërkuri, si edhe Marsi, bëhet shkas për të ndodhur ngjarja, por nuk është tragjike.
Me Mërkurin në prapavijë kemi pengesa në komunikim, keqkuptime, fjalët i themi ndryshe dhe interpretohen ndryshe, harrojmë gjëra ose prishen pajisjet elektronike. Dalin gjëra në pah që i kemi anashkaluar dhe nuk u kemi dhënë rëndësi, çfarë mund të kemi lënë pa plotësuar në letra. Mërkuri është i dobishëm për një introspektivë për të parë si janë gjërat, planet, për korrigjime, rregullime, zgjidhim ato që kemi lënë varur dhe për t’iu kthyer së shkuarës në takime, biseda, zgjidhje të çështjeve që kemi lënë pezull.
Nëse kemi humbur diçka, do ta gjeni, për ata që kanë një biznes mund t’i kthehen klientelës së vjetër, të bëni telefonata, mund të kujtoni dikë për një punë. Për marrëdhëniet ekzistuese, mund të sjellë pengesa.
Javën në vijim do të ketë luhatje sepse ndërsa mund të rregullojmë disa marrëdhënie, pas datës 21 disa shenja ndikohen më shumë dhe mund të hasin probleme.
Chrysanthi Kalogeri: Në datën 18-19, Mërkuri në prapavijë ka një lidhje harmonike gjashtëkëndëshe me Afërditën në Binjak. Është një ditë shumë e mirë për gjërat e së kaluarës që mund ta përdorni në mënyrë të dobishme dhe të rregulloni marrëdhëniet, të afroheni, të udhëtoni me partnerin, të rregulloni letrat etj.
Në fund të javës, duhet të jeni të kujdesshëm në të gjitha marrëdhëniet sepse pas datës 21, mund të keni tendenca të prishen marrëdhëniet, të kemi ndarje të përkohshme. Në datën 19 mund të keni disa probleme lidhur me familjen, prindërit ose një pronë.
Këtu ndikohen më shumë shenjat kardinale Dash, Gaforre, Peshore dhe Bricjap të lindur në ditët e fundit të shenjës dhe për marrëdhëniet personale, duhet të jenë shumë të kujdesshëm Peshqit, Virgjëresha, Binjakët dhe Shigjetari të lindur në fund të 10-ditëshit të dytë të shenjës dhe në fillim të 10-ditëshit të tretë.
Sa i përket klimës së përgjithshme të verës, astrologia thotë se ky vit është i veçantë për shkak të lëvizjes së planetëve të mëdhenj. Edhe vera do të jetë e veçantë dhe të gjitha shenjat e lindura në ditët e para të muajit të tyre, do të përballen me ndryshime rrënjësore.
Chrysanthi Kalogeri: Ata që do të shikojnë jetën e tyre të ndryshojë komplet janë të lindurit në ditët e para të shenjës. Peshqit, Virgjëresha, Binjakët dhe Shigjetari, të lindur në ditët e para do të kenë ndryshime nga planeti i Uranit që do të kenë disa takime të papritura, ndarje, ndryshime në profesion, ndryshime jetese.
Gjithashtu ndikohen shumë edhe shenjat e zjarrit dhe ato kardinale nga Jupiteri që bëri kalimin e tij dhe gjithë hënat e reja që bëhen, bëhen në gradat e para të shenjave./tvklan
