Kancelarja gjermane, Angela Merkel ka prezantuar sot në Parlamentin Europian, programin e presidencës së Këshillit për këto 6 muaj.
Një ndër pikat kryesore në objektivat e politikës së jashtme që përmendi Merkel ishte dhe ajo e negociatave me vendet e Ballkanin Perëndimor.
“Gjatë kryesimit tonë ne duhet të bëjmë gjithçka që kemi në dorë për t’u fokusuar në tre objektiva të tjerë të politikës së jashtme. Pikë së pari për Konferencat e Anëtarësimit, duhet të angazhohemi në bisedimet me Maqedoninë e Veriut dhe, mundësisht, edhe me Shqipërinë, një përparim për vendet e Ballkanit Perëndimor të cilëve iu duhet dhënë perspektiva e anëtarësimit”, tha Kancelarja Merkel.
Kujtojmë se korrnizës negociusese me BE-në për Shqipërinë iu shtua një amendament i votuar në PE, i cili ka 15 kushte të cilat i kërkohen Shqipërisë të plotësohen përpara Konferencës së Parë Ndërqeveritare e cila shënon edhe nisjen defacto të negociatave.
Këto kushte u vendosën nga Këshilli Europian (shtetet anëtare) me propozimin e Gjermanisë, Francës, Hollandës, Danimarkës e Spanjës në mars të këtij viti.
Pro amendamentit votuan Grupi Liberal dhe ai Konservator si dhe shumë deputetë nga e majta dhe djathta pavarësisht qendrimit formal të grupeve.
Komisioni Evropian i paraqiti një javë më parë Këshillit draftin e kornizës së negociatave për Shqipërinë dhe Maqedoninë e Veriut, duke përcaktuar udhëzimet dhe parimet për bisedimet e tyre të pranimit. Kuadrat negociues vendosin udhëzimet dhe parimet për negociatat e pranimit dhe janë unike për secilin vend kandidat. /Opinion.al
