Milan-i vijon të studiojë tregun futbollistik në kërkim të një sulmuesi të nivelit të lartë: Morata mbetet në krye të listës së kuqezinjve, por rriten edhe kuotat e Kalinic. Administratori Marco Fassone dhe krahu i djathtë i tij drejtori sportiv Massimiliano Mirabelli, vazhojnë punën për ndërtimin e Milani-t të ri, i pari pas kalimit të pronësisë në duart e kinezëve. Presidenti Yonghong Li ka detajuar linjat që duhen ndjekur: skuadra kuqezi do të përforcohet duke marrë nga një lojtar “big” për secilin repart. Në këtë kontekst pas qartësimit të çështjes Musacchio për mbrojtjen, rivalitetit të fortë me Roma-n për mesfushorin Kessié, evidentimi i një sulmuesi të nivelit të lartë është prioriteti.
Ëndrra e shoqërisë së re kuqezi mbetet spanjolli i Real Madrid-it, Alvaro Morata. Sipas “Il Corriere della Sera”, ndërmjetësi në negocatat me “Los Blancos”, është avokati Beppe Bozzo, i njëjti përson që në 2014-ën e solli sulmuesin te Juventus-i. Por problem është se për momentin Real nuk dëgjon të ulet në bisedime, dhe për çdo lloj diskutimi ka vendosur të presë fundin e sezonit. Veç të tjerash spanjollët nuk heqin dorë nga kërkesa prej 80 milionë eurosh për lojtarin e tyre, i cili në këtë sezon ka realizuar 18 gola në 38 prezenca në të gjitha kompeticionet, pa arritur të gjejë vazhdimësi, duke qënë se në 19 raste e ka nisur lojën nga stoli. Por nga ana tjetër është edhe konkurrenca e fortë e klubit anglez, Chelsea.
Për të shmangur që në fund të mbetet duarbosh, Milan-i sipas “Corriere dello Sport” po mendon edhe për një “Plan B”, që ka si opsion Nikola Kalinic, sulmuesin aktual të Fiorentina-s. Kroati ka karakteristikat e duhura për të bërë mirë me Montella-n. Në fakt është një sulmues që merr pjesë në manovër, që sakrifikohet në fazën kur topi nuk është në zotërim, si dhe është efikas në zonën e rreptësisë.
Sulmuesi i vjollcëve këtë vit ka realizuar 19 gola në total në 39 prezenca në të gjitha kompeticionet. Nëse kufizohemi vetëm te kampionati, Kalinic gjithsesi ka bërë më mirë se Bacca: 14 gola deri tani, kundrejt 13 të kolumbianit të Milan-it. Në nivelin taktik mund të bëjë mirë në një 4-3-3, por edhe në një 4-2-3-1 të mundshëm. Firorentina ka vendosur për të një klauzolë prej 50 milionë eurosh. Por kuqezinjtë nuk dëshirojnë të shpenzojë një shifër kaq të lartë. Ideja e momentit është për ta zbritur kërkesën e vjollcëve në 35 milionë euro, duke marrë në konsideratë edhe moshën e Kalinic i cili bëri 29 vjeç në 5 janar. Kinezët në këtë pikë, presin një sijnal pozitiv nga klubi.
