Kombëtarja vijoi me përgatitjet në kapin stërvitor në Austri. Seanca e paradites nisi me disa minuta vonesë, pasi inspektorë të UEFA-s kryen teste antidoping për 10 lojtarë, diçka e zakonshme para turneve të tillë.
Gianni De Biasi po vijon me dy seanca stërvitore në ditë ku gërshetohen përgatitjet fizike me ato taktike. Në listën paraprake janë 27 lojtarë, të cilët do të mbeten 23 në fund të muajit. Ledian Memushaj shpreson të jetë njëri prej tyre.
“Jam në formë të mirë dhe shpresoj që të jem në 23 lojtarët që do të zgjedhë trajneri”, deklaroi Ledian Memushaj. Portieri i Kuqezinjve, Etrit Berisha i vlerëson të gjithë kundërshtarët, por duke veçuar lojtarët francezë.
“Franca më duhet ekipi më i fortë po ta shikojmë nga cilësitë e individëve, por duhen vlerësuar edhe Zvicra dhe Rumania”, deklaroi Etrit Berisha, portier i Kombëtares.
Kombëtarja gjatë grumbullimit në Austri po mendon edhe për bamirësi, pasi dhuruan dy fanella të firmosura nga të gjithë, që do të shiten dhe paratë do t’i dhurohen Fondacionit Spitalor të Nënës dhe Fëmijëve. /TV KLAN
