Tre vjet pasi Ministrat e Jashtëm të Shqipërisë dhe Greqisë nënshkruan një memorandum në Tiranë, ky dokument do të ratifikohet tashmë edhe në parlamentin grek.
Bëhet fjalë për memorandumin e bashkëpunimit midis dy Ministrive respektive, me qëllim përshpejtimin e procesit të anëtarësimit të Shqipërisë në Bashkimin Europian.
Projektligji përkatës është shqyrtuar të enjten në një mbledhje të Komisionit parlamentar të politikës së jashtme.
Dy partitë e koalicionit qeveritar Syriza dhe Grekët e Pavarur, si dhe partia “To Potami”, janë shprehur në favor të votimit të tij.
Partia më e madhe opozitare Demokracia e Re, PASOK dhe Unioni i Qendrës thanë se do të pozicionohen gjatë diskutimit në seancë plenare kur edhe do të hidhet në votim.
Ndërsa Agimi i Artë dhe Partia Komuniste thanë se do të votojnë kundër.
Në fund, Komisioni ka propozuar që projektligji të votohet nga parlamenti pa asnjë ndryshim.
Gjatë diskutimeve në komision e ka marrë fjalën edhe deputeti i Agimit të Artë Kristos Papas, i njohur për deklaratat e tij antishqiptare.
Papas theksoi se “Agimi i Artë i thotë jo anëtarësimit të Shqipërisë në Bashkimin Europian, në kohën që SHBA, NATO dhe BE mbështesin planet e shqiptarëve për krijimin e Shqipërisë së madhe”.
Papas akuzoi qeverinë aktuale greke pse siç tha, “falë politikave të saj, 50% e ushtarëve në ishujt e Greqisë janë me origjinë shqiptare”.
“Kryeministri i Shqipërisë, narkotrafikanti Edi Rama dhe budallenjtë e Tiranës do t’i shkaktojnë edhe më tej shumë të këqija atdheut tonë”, përfundoi deputeti i ekstremit të djathtë, i cituar nga portali i Agimit të Artë./R.Goro -OraNews/
