Kryeministrja italiane, Giorgia Meloni, në një deklaratë pas përfundimit të samitit të NATO-s, ka bërë të ditur se i ka kërkuar Presidentit Donald Trump dhe liderëve të tjerë që të tregojnë të njëjtën vendosmëri si në përballjen me konfliktin midis Izraelit dhe Iranit edhe për krizën në Ukrainë dhe në Rripin e Gazës.
“I thashë Presidentit Donald Trump dhe samitit se e njëjta vendosmëri që u tregua në luftën mes Izraelit dhe Iranit duhet të përdoret edhe për dy armëpushime të tjera: për Ukrainën dhe për Gazën. Situata në Gaza është e paqëndrueshme”, deklaroi Meloni gjatë një konference për shtyp në mbyllje të samitit.
Komentet e saj vijnë në një moment kritik për politikën ndërkombëtare, me tensione të vazhdueshme në Lindjen e Mesme dhe një luftë që ende po vazhdon në Ukrainë.
Meloni theksoi nevojën për një qasje të bashkërenduar dhe të fortë nga Perëndimi për të shtyrë drejt një zgjidhjeje diplomatike në të dyja frontet.
Deklarata e Melonit është parë si një përpjekje për të riafirmuar rolin e Italisë në diplomacinë ndërkombëtare dhe për të promovuar një qasje më aktive të NATO-s në çështjet humanitare dhe të sigurisë globale.
