TIRANË- Ish- Presidenti Rexhep Meidani dhe një nga veteranët e PS-së thonë se fushata e nisur nga Rama “të pastrojmë Shqipërinë” është në thelb nisja e fushatës elektorale për zgjedhje, mbase edhe të parakohshme. Por çfarë thotë Rexhep Meidani për kabinetin Rama? Sipas tij disa janë mediokër dhe disa dembelë. Në një shkrim në gazetën Panorama, ai rrëfen edhe një barsaletë që sipas tij qarkullon në Tiranë.
“Por, le të kthehemi te një histori humori, që ka filluar të qarkullojë edhe në Shqipëri. Një nga ministrat e kabinetit, të sulmuar dhe akuzuar publikisht, pas mjaft dështimesh, në vend të dorëheqjes, u këshillua të shkonte për vizitë te doktori dhe të bënte një skanim të trurit, duke dyshuar për depresion. Pas skanimit, doktori, duke lexuar pamjet e përftuara, i tha ministrit: “Z. ministër, kam dy lajme të hidhura për ju: së pari, sipas skanimit, unë shoh se truri juaj ka dy anë, anën e majtë dhe anën e djathtë”.
“Ministri, i çuditur nga ky pohim, menjëherë e ndërpreu doktorin: “A nuk është kjo normale, doktor? Unë gjithmonë kam menduar se çdo tru ka dy anë!”… “Pa dyshim”, u përgjigj doktori “Por, truri juaj është krejt i pazakontë, sepse, në anën e majtë, unë nuk gjej asgjë normale, aty nuk ka asgjë të rregullt. Ndërsa, në anën e djathtë, nuk shoh asgjë, nuk ka pasur apo, ndoshta, nuk ka mbetur më asgjë…”, shkruan Meidani.
