Kryetari i Partisë Republikane Fatmir Mediu, i ftuar në “Abcnews” është shprehur se pa u larguar kryeministri Edi Rama opozita nuk do të futet jo vetëm në zgjedhjet lokale, por dhe në ato parlamentare.
“Me Edi Ramën Kryeministër ne nuk do hyjmë në zgjedhje as lokale as parlamentare”, –tha Mediu.
Po ashtu, Mediu ka folur dhe për sistemin e drejtësisë në Shqipëri, duke thënë se reforma ka dhunuar Kushtetutën e vendit, pasi është jashtë afateve ligjore.
Kryetari i Partisë Republikan tha gjithashtu se Europa nuk mund të hapi negociatat për aq kohë që në Shqipëri ka krim dhe korrupsion.
“Reforma në drejtësi bazohet në dy kolona; vetingu që është i domosdoshëm dhe krijimi institucioneve që bënin propozime dhe plotësonin vendet vakante. Shteti ka dhunuar Kushtetutën se ka pasur afate ligjore të zbatimit të reformës në drejtësi që nuk kanë funksionuar për shkak të qëllimeve të mbrapshta. Ka qenë një lojë për të arritur në këtë nivel, pastrimi i gjykatave.
Vendi ynë duhet të jetë serioz dhe partner. Nëse Europa do mbyllte sytë përballë krimit, korrupsioni, mosfunksionimit të institucioneve, zgjedhjeve të lira kjo do të ishte në dëm të qytetarëve shqiptarë. Anëtarësimi nuk na bën më evropian. Çështja është ta bëjmë Brukselin të vijë në Shqipëri”./Opinion.al E.Xh.
