Kreu i Partisë Republikane, Fatmir Mediu është “kapur mat” sot me sekretarin e përgjithshëm të Kryeministrisë, Ëngjell Agaçi, që është një nga njerëzit më të besuar të Ramës. E para që të shkon në mendje është se aleati kryesor i Bashës dhe funksionari i lartë i Kryeministrisë po neogciojnë për gjetjen e një zgjidhje për daljen nga kriza politike… por vetë Mediu nuk e ka pohuar këtë.
Sakaq në media aludohet se Rama apo ambasadorët e huaj kanë përdorur çdo formë për të bindur partitë e vogla të futen në zgjedhje pa PD-në.
Në këto foto, shihen Mediu dhe Agaçi duke konsumuar një kafe në zonën e “Liqenit të Thatë” në Tiranë.
Pas publikimit të fotos në mediat online, Mediu nuk preferoi të japë detaje mbi temën e bisedës, por ironizoi duke thënë se “po flisnim për 1 Majin”.
“Jam fotografuar në një lokal tek shtëpia ime dhe mund t’ju them se Ëngjëlli dhe unë jetojmë në të njëjtin pallat, ndaj dhe pimë një kafe. Duhet të mos e pimë kafen tani si në kohen e komunizmit, se mos na prishet biografia? Nuk ishte asgjë, ishte një mik i përbashkët u ul ai më parë dhe pastaj ndejtëm dy minuta së bashku”, u shpreh ai.
Nga fotoja nuk shihet në tavolinë një person i tretë siç thotë Mediu.
Ndërsa pyetjes së ‘BW’ se për çfarë po diskutonit, ai iu përgjigj me ironi: Po flisnim për 1 Majin!!!
