Në disa prej mediave spanjolle këtë fund qershori rekomandohet Shqipëria si një destinacion trend për pushimet e kësaj vere.
Revista “Viajar”, e specializuar në çështjet e turizmit, shkruan se teksa në të gjithë Europën çmimet po rriten dhe plazhet më të famshme mbushen me çadra që në mëngjes herët, ka një vend të qetë, me ujë të pastër dhe një frymë mesdhetare, që mbetet sekret.
Shkrimi është përqendruar te Ksamili, për të cilin thuhet se është një parajsë në jug të vendit, ku ende mund të shijohen pushime verore me ndjenjën e një arratisjeje ekzotike, pa shpenzuar shumë.
“Ksamili është po aq mbresëlënës sa ishujt grekë që mund të shihni përtej detit”, thuhet në shkrim, i cili sugjeron edhe një vizitë në parkun e Butrintit shumë pranë tij.
Rivierën shqiptare e rekomandon edhe media tjetër spanjolle “La Verdad Noticias”, e cila është ndalur në Dhërmi, Himarë dhe Ksamil. Sipas saj, Shqipëria mbetet ende një zhevahir sekret për t’u zbuluar, larg turmave të turistëve që mbipopullojnë brigjet e Greqisë dhe Italisë.
“Ky vend i vogël ballkanik, prej kohësh larg radarit turistik, po e çimenton veten si destinacioni i Evropës për verën e vitit 2025”, thuhet në shkrim.
Tv Klan
