“Çfarë testi për Puccini-n në ‘Madama Butterfly’. Ai kërkoi për një soprano që duket si 15, por ka qëndrueshmëri vokali si një 40 vjeçare. Nga pamja duket si një japoneze, por nga stili i të kënduarit duket si italiane. Ajo duhet të jetë e brishtë si një flutur, por e fortë si një kalë për të udhëhequr orkestrën e fuqishme”- kështu e ka nisur shkrimin e tij gazetari i prestigjiozes Financial Times për sopranon shqiptare, Ermonela Jaho.
Ajo është bërë kryefjalë e mediave të njohura botërore me paraqitjen e saj të fortë dhe emocionuese në Pallatin e Operës Mbretërore në Londër në shfaqjen “Madama Butterfly”.
“Ajo është më delikatja e mundshme për rolin në Butterfly. Sopranot tjera mund të këndojnë më fuqishëm, por ajo jep emocionin, dhe të dridh. Kombinimi i fragjilitetit të saj dhe llava që del nga Orkestra është kombinim perfekt” shkruan kritika e fundit e Financial Times përJahon.
Ndër të tjera, The Independent shkruan: “Dueti i saj i mrekullueshëm me Puenten përlot deri në parajsë, dhe interpretimi i saj i gjatë solo në të cilën shpresa lufton me frikën, na mban pezull në secilën pjesë: ajo është Madam Butterfly më e mirë që ka parë Londra prej vitesh.”
Edhe The Guardian e ka vlerësuar në maksimum performancën e sopranos shqiptare.
“Ermonela Jaho, një nga interpretimet më të mëdha, sjell vërtetësinë pa kompromis në rol dhe kjo kombinohet me vulnerabilitetin, gjë që ju bën të shpërtheni në lot.”- shkruhet në artikullin e kritikës së plotë për shfaqjen operistike.
Ermonela Jaho ka zënë vend edhe në një edicion special në Radio BBC, me anë të të artikulli me kryetitull: “Nga Shqipëria komuniste në skenën botërore”.
