Në mars të këtij viti u ekzekutua avokati Ravik Gurra. Ai konsiderohej si avokati i grupeve kriminale i afërt me fisin Çapja në Elbasan.
E përditshmja “DailyMail” ka realizuar një shkrim me ekzekutimin e Gurrës. Në shkrim thuhet se një avokat me nënshtetësi britanike, i cili konsiderohej si avokati i grupeve kriminale është ekzektuar, pasi ka humbur një sërë çështjesh gjyqsore, ku ishin të përfshirë persona me profil të lartë kriminal.
50-vjeçari Ravik Gurra u qëllua 3 herë në kokë nga një armë me silenciator nga një njeri i armatosur, ndërkohë që ishte në një kafe me miq në qytetin e Elbasanit.
Sipas DailyMail, vrasja e tij ka tronditur Harpenden, vendin në Britani ku ai jetonte së bashku me bashkëshorten Nina dhe dy vajzat adoleshente.
Gurra, ka përfaqësuar në Shqipëri një sërë grupesh kriminale, duke përfshirë anëtarë të fisit Çapja, por kishte humbur disa çështje gjyqësore.
Në nëntor ai përfaqësoi Emiljano Shullazin, i cili u shpall fajtor për zhvatje dhe drejtimin e një organizate kriminale, ku u dënua me 14 vjet heqje lirie.
Nuk ka prova për përfshirjen e Shullazit, apo dijeninë e tij në atentatit ndaj Gurrës. Një avokat shqiptar, i cili kërkoi që identiteti i tij mos të bëhej i ditur, u shpreh për DailyMail:
“Vrasja e Ravik Gurrës ka bërë që të gjithë avokatët e grupeve kriminale të frikësohen. Ne nuk jemi të sigurt për të përfaqësuar një mafioz. Bandat kriminale veprojnë jashtë çdo kufiri. Nëse ata vrasin avokat në Shqipëri, pasi ata humbin një çështje, ata mund t’i vrasin avokatët edhe në vende si Gjermania apo Anglia, gjithashtu”.
Një makinë e vjedhur dhe e djegur është gjetur më vonë pas vrasjes, por që nga muaji Mars ende nuk është bërë asnjë arrestim.
Një burim tha për DailyMail se policia në Shqipëri ka dy teori për vrasjen. Njëra ka të bëjë me ndëshkimin që i bënë Gurrës për humbjen e çështjeve gjyqësore, ose është eliminuar nga rivalët e fisit Çapja.
“Është një teori që personat e përfshirë në vrasje ishin të inatosur me humbjen e gjyqeve. Dihej që Ravik Gurra ishte e afërt me Çapjat dhe lidhte anëtarët e një bande në Britani me ata në Shqipëri. Çapjat janë të vështirë për t’u kapur, kështu që grupet rivale mund të vrarë Gurrën për t’u dhënë një mesazh pasi ishte një objektiv më i lehtë,”-përfundoi burimi për DailyMail.
Ravik Gurra u transferua në Britani në vitin 1990 ku u vendos me bashkëshorten e tij dhe fitoi nënshtetësinë britanike. Fqinjët e tij në Britani e përshkruanin si një njeri miqësor dhe familjar./Opinion.al/
