Zgjedhjet parlamentare në Shqipëri kanë tërhequr vëmendjen e mediave të huaja, të cilat vlerësojnë se ato janë shumë të rëndësishme për të ardhmen e vendit. Agjencia e lajmeve Reuters i cilëson zgjedhjet e 11 Majit si test për demokracinë dhe anëtarësimin në Bashkimin Europian. Si socialistët, edhe demokratët, thekson Washington Post, synojnë të sigurojnë shumicën në parlament për të çuar përpara negociatat me BE-në.
Agjencia ‘Associated Press’ shkruan se mbajtja e zgjedhjeve të lira dhe të ndershme është kyçe për vijimin e bisedimeve të anëtarësimit. Partitë kryesore kanë premtuar gjatë fushatës një axhendë reformash, rritje të shpejtë ekonomike dhe ulje të papunësisë.
Mediat ndërkombëtare theksojnë se “ky proces zgjedhor do të tregojë nëse vendi ballkanik është gati t’i bashkohet familjes evropiane brenda vitit 2030”.
Socialistët shpresojnë të mbajnë pushtetin për të vijuar Reformën në Drejtësi, ndërsa demokratët kanë premtuar uljen e taksave për të nxitur ekonominë. Edhe mediat italiane theksojnë se objektivi i fituesit të zgjedhjeve është afrimi me Bashkimin Europian. Vëzhguesit ndërkombëtarë nga OSBE-ja, APKE-ja dhe Parlamenti Evropian po vëzhgojnë qendrat e votimit për të verifikuar pretendimet për shenja presioni dhe blerje votash. Klan News
