Urdhri për vrasjen e Devi Kasmit, i ekzekutuar në Tiranë më 29 Janar dyshohet se ka ardhur nga burgjet e Greqisë. Kështu shkruan e përditshmja greke “Kathimerini”, e cila citon një burim të sajin, sipas të cilit, urdhri dyshohet se ka ardhur nga shqiptarë të dënuar për trafik droge, që vuajnë dënimin në Greqi.
Gazeta e arsyeton këtë pretendim me faktin se vrasja e Kasmit lidhet me trafikun e drogës, ku ky i fundit ka qenë i përfshirë.
“Kathimerini” i kushton vëmendje edhe zhvillimeve të deritanishme mbi këtë ngjarje dhe të arrestuarve.
“Një 41-vjeçar i përjashtuar nga forcat e policisë greke u arrestua për vrasjen në Tiranë, të premten. Ai i ka mohuar të gjitha akuzat. Avokati i tij mësohet se ka ofruar 10 mijë euro për ta lënë në liri me kusht, kërkesë e cila u refuzua nga zyrtarët shqiptarë”, shkuan “Kathimerimi” për grekun Efthimios Efthimiu, personi i cili akuzohet si ekzekutori i vrasjes.
E përditshmja greke shkruan gjithashtu se tre shqiptarë të tjerë, Elton Halipaj, Elton Hoxhallari dhe Malvin Dinellari janë arrestuar për vrasjen, teksa policia është në kërkim të një të katërti.
I dyshuari kryesor, shkruan më tej “Kathimerini”, është ish-agjenti special i policisë greke, i larguar nga radhët e saj në 2011-n, pasi rezultonte i implikuar në të paktën 3 raste të trafikut të drogës.
Një ditë më parë, 4 të arrestuarit për vrasjen e Kasmit dolën para gjykatës për t’u njohur me masën e sigurisë. Ata u lanë të gjithë në burg. E njëjta masë, por në mungesë u dha edhe për personin e dyshuar si organizator i vrasjes, Aurel Hoxhallari, i cili vijon të mbetet në kërkim.
Prokurori i çështjes paraqiti në sallë prova që sipas tij faktojnë se vrasja e Devi Kasmit u organizua në bashkëpunim me Aurel Hoxhallarin. Filmimet e kamerave të sigurisë tregojnë se 41-vjeçari grek ka qenë në vendin e krimit.
Ai më pas është marrë nga një furgon në drejtimin e të cilit ishte Elton Halipaj. Ndërsa Elton Hoxhallari dhe Malvin Dinellari kanë krijuar kushtet për të kryer atentatin. Në burg vijon të mbahet edhe Mario Meshini, i cili u arrestua një ditë pas vrasjes, pasi u identifikua nga kamerat e sigurisë duke u larguar me motor nga vendngjarja.//tvklan.al
