Liderët e Ballkanit Perëndimor dhe vendeve anëtare të BE-së do të jenë mbrëmjen e të hënës në Athinë, në një darkë joformale të organizuar nga kryeministri grek Kyriakos Mitsotakis për zgjerimin dhe të ardhmen evropiane të rajonit, me rastin e 20 vjetorit të Samitit BE-Ballkani Perëndimor dhe “Deklaratës së Selanikut”.
Ftesës së kryeministrit grek i janë përgjigjur pozitivisht presidentja e Komisionit Evropian, Ursula von der Leyen dhe presidenti i Këshillit Evropian, Charles Michel.
Pjesëmarrja e tyre në darkë është sa kuptimplote dhe simbolike sepse më 21 qershor u bënë 20 vjet nga “Deklarata e Selanikut” e Samitit BE-Ballkani Perëndimor që u zhvillua gjatë Presidencës greke të Këshillit të BE-së dhe që hapi rrugën për përfshirjen e disa vendeve të rajonit në Bashkimin Europian.
Protothema shkruan se prezent do të jenë presidenti serb, Aleksandër Vuçiç, ai i Malit të Zi, Jakov Milatoviç, kryeministri i Kosovës Albin Kurti, i RMV-së, Dimitar Kovaçevski dhe presidentja e Këshillit të Ministrave të Bosnjës dhe Hercegovinës Borjana Kristo.
“Shqipëria, e ftuar në nivel presidenti, nuk do të përfaqësohet, ndërsa lideri i Sllovenisë nuk mundi të përgjigjet pozitivisht,” – bëjnë me dije mediat greke.
Në diskutim do të marrin pjesë edhe liderët e vendeve të rajonit që janë anëtare të BE-së. Konkretisht bëhet fjalë për kryeministrin e Bullgarisë Nikolai Denkov, atë të Kroacisë Andrej Plenkoviç dhe kryeministrin e Rumanisë Ion-Marcel Ciolakou./Opinion.al
