Mediat greke vazhdojnë të kenë në vëmendje të tyre çështjen e ekstremistit Kostandinos Kaçifas, i cili u vra në datën 28 tetor pasi qëlloi me armë policinë në Bularat.
Por gjatë ditës së sotme, mediat e shtetit fqinj kanë zbuluar detaje të reja, që sipas tyre kanë sjellë reagimin e dhunshëm dhe me armë të Kaçifasit.
Një prej mediave shkruan se Kostandin Kaçifasi kishte ditë të tëra që ngacmohej e provokohej nga policia shqiptare dhe nga inspektori i zonës së Bularatit.
Sipas tyre, pasi Kaçifasi është provokuar për ditë të tëra, ditën që ndodhi ngjarja atij i është vënë edhe arma në kokë.
Mediat greke theksojnë se arma që kishte Kaçifasi në dorë ishte e policit që e ngacmonte dhe që ekstremisti grek ja kishte rrëmbyer nga dora.
Ditën e ngjarjes Kaçifasi është kërcënuar me armë në kafenenë e fshatit, gjë e cila ka sjellë reagimin e tij të dhunshëm, që më pas solli vrasjen nga RENEA.
