Situata alarmante e krijuar pas tërmetit me magnitudë 6.3 mëngjesin e së martës, vijon të raportohet gjerësisht nga mediat ndërkombëtare.
“Tërmeti në Shqipëri, lëkundje të reja ndërsa numri i viktimave rritet. Gazetarët vërejnë se “pjesa më e madhe e vdekjeve janë regjistruar në qytetin bregdetar të Durrësit dhe në Thumanë, pranë epiqendrës së tërmetit. Qindra njerëz e kaluan natën në çadra, të tjerë në makina, ndërsa lëkundjet e tokës vazhdojnë ende”, shkruan BBC.
Po ashtu mediat e vendeve fqinje në Kosovë, Maqedoni e Veriut, Greqi dhe Ital dhanë një raportim më të detajuar për gjendjen pas tërmetit.
“Një tërmet me një madhësi të tillë mund të kishte shkaktuar treqind viktima. Nuk mund të thuhet se “shkoi mirë”, por situata mund të kishte qenë edhe më e rëndë”, shkruan “Corriere della Sera”.
Ndërsa mediat greke shkruajnë se “Shqipëria është në zi kombëtare. Ekipet e shpëtimit vijuan përpjekjet edhe gjatë gjithë natës për të shpëtuar të bllokuarit nën rrënoja, ndërsa të afërmit e të humburve thërrasin me shpresën se mund t’i gjejnë ende gjallë”.
E përditshmja greke SKAI.gr, raportoi edhe momentin kur ekipet e shpëtimit nxorën nga rrënojat një të mbijetuar, ndërsa banorët duartrokasin punën e ekipeve të shpëtimit./Opinion.al
