Kombëtarja Shqiptare do të përballet mbrëmjen e së hënës me Spanjën, një ndër ekipet më të forta të Grupit B, e cila tashmë është kualifikuar.
Mediat spanjolle i kanë kushtuar një artikull kombëtares sonë duke treguar edhe interesin që ka opinionin publik në këtë shtet për sfidën e radhës. E përditshmja spanjolle “Marca”, pasi shkruajti më herët për Kristjan Asllanin, si “mjeshtrin e kateringut”, këtë herë ka “Legjionarët” në tërësi.
Gazeta e Madridit thekson se Shqipëria mund të cilësohet si ekipi me 10 flamuj, sepse lojtarët e saj kanë lindur në vende të ndryshme të Europës. Tetë në Shqipëri, pesë në Zvicër, tre në Maqedoninë e Veriut, tre në Kosovë, dy në Gjermani, dy në Greqi, dhe nga një në Itali, Angli dhe Spanjë.
“Marca” nënvizon se vëndet e lindjes së tyre janë 9, por flamujt bëhen 10 sepse Kosova ka qenë pjesë e një shteti tjetër në kohën kur lojtarët “Kuqezi” kanë lindur aty. Nga emrat që janë në dispozicion të teknikut Sylvinho, veçohen kapiteni Berat Gjimshiti i lindur në Zvicër, dhe sulmuesi Armando Broja, lindur në Britaninë e Madhe.
Në 13 qershor, “Marka” pati një tjetër artikull ku veçohej ekipi ynë përfaqësues, ndonëse shkrimi nuk ishte ekskluzivisht për ne. E përditshmja bëri një klasifikim të ekipeve me më shumë lojtarë të natyralizuar, pra që kanë lindur jashtë kufijve të shtetit, dhe Shqipëria ishte e para në tabelë me 19 futbollistë të tillë.
Pas nesh vijnë Kroacia e Turqia, por me diferencë të madhe sepse kanë vetëm nga 8 lojtarë të lindur jashtë.
