Në një kohë kur shumë turistë nga e mbarë bota vizitojnë Shqipërinë, mediat e huaja gjithashtu po i bëjnë jehonë turizmit në vendin tonë. Sipas një artikulli të botuar në të përditshmen spanjolle “Huffington Post” Shqipëria rekomandohet për plazhet parajsore, ushqim dhe akomodim me çmime të përballueshme.
Sipas këtij artikulli, me rritjen e çmimeve në shumë destinacione të njohura, ka një interes në rritje për vendet ku është ende e mundur të shijosh pushime pa shpenzuar shumë. Dhe këtë gjë e ofron Shqipëria, “vendi më i lirë në Evropë” shihet si një destinacion shumë tërheqës për pushime, veçanërisht duke pasur parasysh se nuk është i mbipopulluar.
Një nga atraksionet kryesore të Shqipërisë është kostoja e ulët e akomodimit. Shumë turistë zgjedhin të marrin me qira apartamente nga individë privatë, gjë që lejon fleksibilitet dhe kursime më të mëdha. Është e mundur të gjesh akomodim për vetëm 10 Euro nata, që përfaqëson një mundësi të mirë krahasuar me çmimet që ofrohen në vendet e tjera evropiane.
Kuzhina shqiptare jo vetëm me çmime të përballueshme por ofron dhe një kombinim të shijshëm të ndikimeve mesdhetare dhe ballkanike. Një tjetër pikë e fortë e Shqipërisë është mikpritja e njerëzve të saj. Diversiteti i peizazhit është mbresëlënës.
Nga plazhet e Rivierës Shqiptare deri te Alpet Shqiptare, gjithmonë ka diçka për të eksploruar. Qytete të tilla si Gjirokastra, një vend i Trashëgimisë Botërore të UNESCO-s, dhe Parku Kombëtar i Butrintit zbulojnë trashëgiminë historike dhe kulturore të vendit.
