Pasi gjykata franceze shtyu sërish vendimin për të liruar ish- kryeministrin e Kosovës, Ramush Haradinaj, mediat e Beogradit sot kanë shkruar për “dëshmitë të reja” të Serbisë, të cilat, sipas tyre e implikojnë ish – komandantin e Zonës Operative të Dukagjinit për krime lufte.
Gazeta e Beogradit “Blic” duke raportuar për këto “dëshmi”, ka thënë se gjoja, Haradinaj ka varrosur të gjallë policë, ka prerë në fyt femra dhe ka dhunuar nuse nëpër dasma.
“Në grumbullimin e këtyre dëshmive prej disa vitesh po punojnë zyrtarët serbë, zëvendësprokurori Dragoljub Stankoviç, ushtruesi aktual i detyrës së prokurorit Milan Petroviç dhe i ish – prokurori Vladimir Vukçeviç”, shkruan Blic.
Ministria e Drejtësisë së Serbisë, para disa ditësh në Gjykatën e Colmarit ka dërguar “dëshmi” në më shumë se 100 faqe dhe siç thotë “Blic”, edhe akt-gjykimin e Tribunalit të Hagës “për të dëshmuar se Haradinaj nuk ngarkohet për veprat për të cilat është gjykuar në Hagë”.
Ministrja serbe e Drejtësisë Nela Kuburoviç ka thënë se në dokumentacionin shtesë ka rrëfime të dëshmitarëve, raporte të MPB-së e të stacioneve ushtarake si dhe procesverbale nga vendet e ngjarjes.
Gjykata e Hagës e ka shpallur dy herë të pafajshëm Ramush Haradinajn.
Dje, Gjykata e Apelit në Colmar, Francë, e ka shtyrë sërish vendimin për lirim ose ekstradimi të tij në Serbi siç dëshiron Beogradi.
Vendimi tjetër është caktuar të merret më 6 prill.
