Kryeministri Rama është fotografuar në tavolinë me kryeministrin serb, Aleksandër Vuçiç dhe atë të Kosovës, Isa Mustafa mbrëmjen e djeshme në Sarajevë. Rama shihet që është në krah të Vuçiçit, ndërsa përballë tyre është Mustafa. Personi që ka publikuar foton në Tëitter shkruan “Gjithçka mund të ndodhë në Sarajevë”.
Por sipas mediave serbe , darka nuk ka qenë e qetë mes kryeministrave të rajonit të mbledhur në Sarajevë dhe që të ftuar nga kreu i presidencës vendase kanë ngrënë një darkë në restorantin “Libertas”.
Sipas tyre, kryeministri Aleksandar Vucic ka pasur një përplasje verbale me kryeministrin e Kosovës Isa Mustafa.
Shkak është bërë një vendim që ka nënshkruar këtë të mërkurë kryeministri i Kosovës për shtetëzimin e të gjitha pronave të ish-Jugosllavisë.
“Blic” shkruan se në fillim të darkës Vuçiç i është drejtuar Mustafës: “Të lutem më thuaj çfarë po ndodh me grabitjen e pronës serbe në Kosovë?” ndërsa ka shtuar: “Ti ke ardhur vetëm apo me ndihmën e dikujt tjetër?”
Atmosfera në mesin e mysafirëve ishte “e tensionuar, dhe në disa raste e pakëndshme” për shkak të konflikteve mes Mustafës dhe Vuçiç. Gjithsesi askush nuk u largua nga darka “edhe pse për një moment u duk se kjo mund të ndodhte”, shkruan gazeta serbe.
