Mediat meksikane kanë publikuar detaje rreth operacionit të së enjtes ku u sekuestruan 613 kilogramë kokainë në portin e Durrësit, si dhe për klanin e narkotrafikut i cili kishte nisur ngarkesën nga Kolumbia.
Portali meksikan online “Sipse” ka publikuar detaje për kartelin e drogës që nisi ngarkesën me 613 kilogramë kokainë nga Kolumbia në Shqipëri. Duke raportuar sekuestrimin e sasisë së drogës në Portin e Durrësit, “Sipse” shkruan se operacioni I policisë ishte i koordinuar me Armatën Kombëtare të Kolumbisë, agjenci ndërkombëtare dhe policinë shqiptare. Në shkrim ndër të tjera theksohet se ngarkesa me drogë ka kaluar në disa porte europiane para se të mbërrinte në portin shqiptar ku dhe u zbulua. Informacionet e dhëna nga agjencitë e ndryshme ndërkombëtare i mundësuan policisë shqiptare që të kryente aksionin.
Kokaina e sekuestruar i përket një strukture të narkotrafikut e cila është e lidhur me “Klanin e Gjirit”, që ka lidhje me porte të ndryshme në Europë në vendet ku dërgojën drogën. Falë këtij sekuestrimi u evitua që më shumë se 37 milionë dollarë, vlera e drogës në tregun e zi ndërkombëtar, të shkonin në arkat e këtij grupi të paligjshëm.
Nga operacioni u arrestuan dy persona: shoferi i kamionit dhe një punonjës i kompanisë. Ndërkohë policia shqiptare shpalli në kërkim pronarin e kompanisë dhe ka hapur një hetim me homologët në Europë për të identifikuar e arrestuar persona të tjerë në lidhje me ngjarjen.
Pronësinë e kësaj sasie droge e konfirmon në një njoftim në faqen e saj zyrtare edhe Armada Kolumbiane.
Por kush është El Clan del Golfo?
El Clan del Golfo, dikur i quajtur Los Urabeños apo Clan Úsuga ose Autodefensas Gaitanistas de Colombia, është një grup i armatosur kolumbian, milici, që merret me trafikun e drogës, i përfshirë në konfliktin e armatosur kolumbian.
Ai konsiderohet si një prej grupeve më të pushtetshme në Kolumbi, me më shumë se 3 mijë anëtarë në rrethin e brendshëm të organizatës. Të ardhurat kryesore të këtij grupi vijnë nga trafiku i drogës.
Ndërkohë, në njoftimin e saj për sasinë e drogës së kapur në vendin tonë, Armada Kolumbiane thotë se operacioni u zhvillua falë bashkëpunimit mes Armadës, agjencive ndërkombëtare dhe Policisë Shqiptare.
“Gjatë një operacioni të koordinuar, ku morën pjesë Armada Kombëtare e Kolumbisë, agjencitë ndërkombëtare dhe Policia Shqiptare, u sekuestruan 613 kilogramë kokainë, në Portin e Durrësit në Shqipëri”.
“Ngarkesë, e cila u zbulua falë shkëmbimit të informacioneve në kohë të agjencive pjesëmarrëse, që i dhanë mundësinë Policisë Shqiptare për të planifikuar një operacion, për të kontrolluar kontenierin në pronësi të një kompanie shqiptare, në momenti që mbërriti në port”.
Më tej në njoftim sqarohet se droga ishte nisur nga Kolumbia në mes të muajit Janar me një anije dhe kishte kaluar në disa porte europiane, përpara se arrinte në portin shqiptar.
Armada Kolumbiane është forca detare e Ushtrisë Kolumbiane.
