Faqet e gazetave dhe ato online janë të mbushura me lajme për vrasjen e politikanit serb Oliver Ivanoviç mëngjesin e djeshëm në zyrën e partisë së tij në Mitrovicën e Veriut. Pjesa më e madhe kanë raportuar për ngjarjen, por ata më të guximshit kanë ngritur edhe pikëpyetjet e para për autorët e ngjarjes. Kështu gazetari i “The Economist” për Ballkanin Tim Judah shkruan në Twitter se “qytetarët që jetojnë në Mitrovicë të Veriut besojnë se fajtorët e kësaj vrasjeje të bujshme janë në veri të Kosovës. Gjurmët shkojnë nga veriu, jo nga jugu”. Akoma më e qartë në këtë pistë është gazeta gjermane “Frankfurter Allgemeine Zeitung” që shkruan: “Vrasje në bastionin e mafias ballkanike”, duke lënë të kuptohet se në Mitrovicën e Veriut që nuk kontrollohet nga policia e Kosovës, po vepron mafia.
Sakaq Beogradi zyrtar është hedhur në ofensivë politike. Presidenti Aleksandër Vuçiç ka kërkuar që prokurorë nga Serbia të marrin pjesë në hetime, gjë që nuk është pranuar nga kryeministri i Kosovës, Haradinaj. Ai tha se hetimet do i zhvillojë EULEX dhe Policia e Kosovës dhe nëse është e nevojshme do të thirren hetues të FBI-së.
Deri më tani nuk ka të dhëna zyrtare për pistën e hetimeve që po ndjek policia vendase dhe as për atentatorët e mundshëm.
Por vrasja e politikanit serb në Kosovë, përveç një ngjarje e rëndë në vetvete, shton frikën e destabilitetit në Kosovë e veçanërisht në veri të saj.
/Opinion.al
