Një sulm me molotov është shënuar sot në një zyrë turistike shqiptare në qendër të Athinës. Sulmi mendohet se erdhi nga një turmë ekstremistësh të djathtë.
Ngjarja ka ndodhur orët e para të mëngjesit të sotëm sipas “Protothema.gr” dhe policia dyshon se sulmi lidhet me vdekjen e 35-vjeçarit Konstantinos Katsifas.
Fatmirësisht, brenda në zyrë në kohën e sulmit nuk kishte asnjë punonjës por as kalimtarë jashtë. Policia thotë se ka rritur masat e sigurisë në zonën që operojnë agjencitë shqiptare të udhëtimeve.
Zyra turistike shqiptare ndodhet në qendër të Athinës, në rrugën 31-33 Deligianni pranë stacionit Larissis. Sipas burimeve fillestare, autorët kanë hedhur bombën në fasadën e dyqanit. Kompania operon në fushën e linjave ndërkombëtare të autobusëve, duke transportuar mbi 140,000 pasagjerë në vit nga Vlora dhe Himara.
Në Greqi ka pasur mjaft trazira pas vrasjes së ushtarit grek nga RENEA në qytetin e Gjirokastrës. Një përleshje e përgjakshme ndodhi mes një grupi grekësh dhe shqiptarësh pak para orës 2 të mëngjesit të djeshëm, në periferi të Athinës.
Pas vrasjes së të riut, i cili hapi zjarr mbi policinë shqiptare, në Athinë u mbajtën protesta para ambasadës së Shqipërisë.
