Ky është momenti kur një nga anëtarët e grupit të shpërndarësve të drogës, me drejtues 35-vjeçarin, Herald Rexhepaj, i shet doza kokaine një klienti te tyre në zonën e Kodrës së Diellit në kryeqytet.
Tv Klan ka siguruar këto pamje të filmuara nga një kamera amatore, ku shfaqet një nga 8 të arrestuarit në kuadër të operacionit anti-drogë të finalizuar pas 6 muajsh hetime. Krahas të arrestuarve, u shpall në kërkim dhe një 28-vjeçar, ndërsa në këtë operacion u sekuestruan 650 doza kanabis, 150 doza kokainë, 1 kg kanabis.
Takimet mes shitësve të drogës dhe klientëve të tyre bëheshin në rrugë, aty ku dhe janë filmuar dhe nga agjentët e hetimit të narkotikëve në policinë e Tiranës.
“Më sill birra ose pica”, ishin kodet që përdoronin klientët e tyre kur porosisnin doza kokaine dhe kanabisi tek grupi që lëndën narkotike ka dyshime se e siguronte në zonën e Fushë-Krujës e më pas e shpërndante në kryeqytet.
Baza e grupit ishte tek zona e Kodrës së Diellit, aty ku dhe banonte Herlad Rexhepaj së bashku me bashkëjetuesen e tij, Viola Bendaj. Këto dy të fundit dyshohet se drejtonin dhe grupin e shpërndarësve,
35-vjeçari, Rexhepaj nuk është një emër i panjohur për policinë, pasi dhe më herët ka qenë i ndaluar për drogë.
