Guvernatori i shtetit amerikan të Kentakit ka thënë se më shumë se 70 njerëz u vranë nga tornadot të premten mbrëma në SHBA.
Andy Beshear tha se shifra mund të rritet në më shumë se 100 në ato që ai i quajti tornadot më të këqija në historinë e shtetit.
Dhjetëra persona dyshohet se kanë vdekur brenda një fabrike qirinjsh në qytetin Mayfield, ndërsa në Kentaki është shpallur gjendja e jashtëzakonshme.
Presidenti i SHBA Joe Biden shkroi në Tëitter se ai ishte informuar për tornadot të shtunën në mëngjes.
“Të humbasësh një të dashur në një stuhi si kjo është një tragjedi e paimagjinueshme,” tha ai. “Ne po punojmë me guvernatorët për t’u siguruar që qytetarët të kenë atë që u nevojitet ndërsa kërkimi për të mbijetuarit dhe vlerësimet e dëmeve vazhdojnë.”
Policia tha se tornado shkaktoi “dëme të konsiderueshme” në të gjithë pjesët perëndimore të shtetit. Një tren doli nga shinat gjatë erërave ekstreme në Hopkins County, tha sherifi Matt Sanderson për WKYT-TV.
Ai gjithashtu përshkroi se si dy fëmijë u raportuan të zhdukur gjatë një tornadoje, por më pas u gjetën në një vaskë që ishte nxjerrë jashtë nga forca e erës./Opinion.al
