Të paktën 125 persona raportohet të kenë humbur jetën në stuhitë e rërës në Indinë veriore me zyrtarët që paralajmërojnë se moti i keq do të vazhdojë.
Erëra të forta dhe rrufe kanë shkatërruar shumë fshatra, kanë shembur mure dhe kanë plagosur me qindra vetë. Zyrtarët e ndihmave në Uttar Pradesh thonë se numri i viktimave është më i larti në stuhi të tilla në të paktën 20 vitet e fundit. Sipas tyre, bilanci i viktimave mund të rritet në ditët në vijim.
Departamenti meteorologjik në indi thotë se më shumë stuhi pritet të regjistrohen në rajon para fundjavës. Njerëzit duhet të qëndrojnë në gadishmëri- thanë drejtuesit lokalë.
Në dy shtete, Utarpradesh dhe Raxhastan, stuhia ka ndërprerë edhe energjinë elektrike, ka shkulur pemë me rrënjë, ka shkatërruar shtëpi dhe vrarë bagëtitë. Rajoni i Agras në Uttar Pradesh, ku ndodhet edhe monumenti i Taxh Mahalit, është një nga zonat e goditura më rëndë. Stuhitë kanë prekur edhe tre rajone në shtetin fqinj Raxhastan, Alvar, Baratpur dhe Dholpur.
Shumë nga viktimat kanë qenë duke fjetur kur shtëpitë e tyre janë shembur pas goditjes nga rrufetë apo si pasojë e erërave të forta. Kryeministri indian, Narendra Modi, tha në Twitter se ishte i trishtuar nga humbja e jetëve njerëzore. Ai ngushëlloi familjet dhe tha se do të bëhej gjithçka e mundshme për të ndihmuar të prekurit.
