Një ish-financier 85-vjeçar u përball me një grabitje në shtëpinë e tij në Bergamo, duke plagosur me armë zjarri një nga grabitësit.
Sipas mediave italiane mësohet se ngjarja ka ndodhur mbrëmjen e së shtunës, më 27 prill, rreth orës 21:30, në lagjen periferike Longuelo.
Hajduti i plagosur, një shtetas shqiptar 26 vjeç, është goditur nga plumbi në qafë por nuk ndodhet në gjendje të rëndë shëndetësore.
Pas ngjarjes, ai u arrestua nga policia pranë rezidencës së ish-financierit, me akuzën e grabitjes së rëndë. Pas marrjes së mjekimit të nevojshëm dhe daljes nga spitali, autori u transferua në burg.
Bashkëpunëtori i hajdutit, gjithashtu një 26-vjeçar me kombësi shqiptare, është arrestuar nga policia pak orë pas ngjarjes.
Të dy kriminelët tani janë të akuzuar për vjedhje të rëndë dhe kundërshtim ndaj një zyrtari publik.
Sulmuesit, të maskuar me kapuç, kishin hyrë në shtëpinë e të moshuarit nga një dritare në pjesën e pasme, të cilën e kishin hapur me një levë.
Në momentin e ndërhyrjes, pensionisti ishte në shtrat, duke parë televizor. Sipas dëshmive, ish-financieri e kishte armën të fshehur nën jastëk dhe nuk hezitoi ta përdorte për t’u mbrojtur, duke qëlluar me një të shtënë e cila i ka shtyrë hajdutët të largohen, duke marrë me vete edhe çantën e të moshuarit./Opinion.al
