Kryetari i Partisë Demokratike, Lulzim Basha, po zhvillon këtë të hënë një takim elektoral me gratë në njësinë Dajt.
Basha ka prezantuar planin e PD-së dhe ka theksuar se me uljen e taksave, të çmimit të naftës dhe të energjisë edhe sipërmarrësit do të jenë në gjendje që të paguajnë punonjësit.
Më tej, ai ka premtuar se nëse PD vjen në pushtet nuk do të ketë paga poshtë 300 eurosh në muaj në vendin tonë.
“Unë e kam ndjekur ecurinë e fasonerisë që është futur në krizën më të thellë të këtyre 8 viteve dhe kjo për shkak se është rritur çmimi i naftës. Këto para shteti ja ka marrë. Gjithashtu rritja e çmimit të energjisë elektrike ishte një tjetër masë që ndikoi tek fasoneria. Kur erdhi pandemia ne kërkuam që të mbyllnin fasoneritë dhe të paguanin punonjësit sepse ishte si një bombë por nuk na dëgjuan derisa plasi në Krujë dhe në Fushë-Krujë.
Ne kemi për qëllim që me garantimin e një ambienti miqësor me uljen e taksave të ndihmojmë të gjithë sipërmarrësit shqiptarë. Në Shqipëri nuk do të ketë pagë nën 300 euro. Plani ynë do sjellë rritje ekonomike”, tha Basha.
Gjatë takimit nuk kanë munguar akuzat ndaj kryeministrit Edi Rama, për të cilin Basha tha se pasi ka parë programin e PD ka premtuar rritjen e pagave.
“Por pasi ka parë programin tonë kryeministri si një kopjac i keq thotë se do të rrisë pagat, ndërkohë që për 8 vite nuk bëri asgjë. Me rritjen e pagës do të rritet kontributi shoqëror, mënyra që ne i përqasemi tregon dhe ndryshimin e madh që ne kemi me njëri- tjetrin”, ka thënë Basha.
