TIRANË- Ndërsa protestat apo lëvizjet qytetare në Tiranë janë shumë të rralla, shoqatat duket se janë më të motivuar për të protestuar jashtë vendit kundër Ramës. Leonard Dedaj dhe lëvizja e tij “Reago” kanë shpërndarë disa fletëpalosje përpara Galerisë Kampl në Mynih ku qendrojnë të ekspozuara prej disa ditësh edhe skicat e Kryeministrit Edi Rama. Motiv i kësaj proteste sipas organizatorëve është neglizhenca që tregoi Z. Rama ndaj refugjatëve shqiptarë që janë strehuar në kampin e azilantëve në Gjermani. Lëvizja ‘Reago’ u ka kërkuar qytetarëve gjermanë të braktisin ekspozitën e Ramës ashtu siç ai ka braktisur popullin e tij. “Kryeministri i Shqipërisë vjen në Munich për axhendën e tij personale. Atij nuk i intereson aspak rreth mijëra emigrantëve shqiptarë që qëndrojnë në Gjermani. Ai i përçmon ata, ndërsa u solli vetëm dhimbje, burg dhe varfëri ekstreme, dhe kjo është arsyeja pse ata vijnë këtu (Gjermani), sepse nuk kanë ku të shkojnë. A e dini ju gjermanë të dashur që në Shqipëri ne jetojmë në një gjendje terrori konstante nën regjimin e Ramës? E dini që të drejtat e njerëzve në Shqipëri janë më të këqijat në Europë?!” Janë këto disa nga radhët që janë shkruar në fletëpalosjet që Dedej u shpërndau kalimtarëve në Mynih duke u kërkuar të injoronin artin e Ramës.
