Dritan Rexhepi është padyshim emri më i lakuar në Shqipëri për trafikun e kokainës. Interpoli ka përditësuar fotografitë e 40-vjeçarit që ndodhet në burgun e sigurisë së lartë në Kuito të Ekuadorit.
Ndaj tij ka shumë akuza si bashkëpunim në vepra kriminale; vrasje me paramendim; lëndim i rëndë me dashje; prodhimi dhe mbajtja e paligjshme e armëve dhe municioneve ushtarake, falsifikimi i vulave, Formularëve; dokumenteve të identitetit; rrëmbimi ose mbajtja peng e një personi dhe trafikimi i narkotikëve.
Në faqen zyrtare të Interpolit, ndaj Dritan Rexhepit ka dy kartela, një për llogari të Shqipërisë dhe një për Belgjikën, pasi ai është shpallur në kërkim në të dyja këto shtete. Atij i është vendosur një nivel i kuq rrezikshmërie, më i larti, nga Interpoli.
Dritan Rexhepi ka një të shkuar kriminale në vendin tonë pasi akuzohet për vrasjen e një polici por emri i tij ishte disi i harruar dhe u përmend në media pas rrëmbimit të Jan Pregës në Kamëz në janar të këtij viti. Ai u përfol si njeriu që kishte urdhëruar këtë rrëmbim por asgjë nuk u verifikua. Emri i Dritan Rexhepit doli sërish në dritë pas operacionit “Los Blancos”. Nga hetimet e autoriteteve italiane rezultonte se Rexhepi ishte personi me lidhje të fuqishme me kartelët e kokainës së Amerikën Latine dhe se ai ishte kontakti i grupeve të trafikut të lëndës narkotike drejt Europës./ Opinion.al
