Presidenti i SHBA, Joe Biden, ka rënë dakord “në parim” për të mbajtur një samit me presidentin rus Vladimir Putin, propozim ky i homologut francez, Emmanuel Macron.
Ky samit, ku do të diskutohet për krizën në Ukrainë, do të zhvillohet vetëm nëse Rusia nuk pushton fqinjin e saj Ukrainën, tha Shtëpia e Bardhë.
Takimi mund të ofrojë një zgjidhje të mundshme diplomatike për një nga krizat më të këqija të sigurisë në Evropë në dekada.
Zyrtarët amerikanë thonë se inteligjenca sugjeron se Rusia është gati të nisë një operacion ushtarak, të cilin Moska e mohon.
Propozimi u njoftua nga presidenca franceze pas dy telefonatave mes presidentit Emmanuel Macron dhe zotit Putin, të cilat vazhduan për gati tre orë në total.
Përgatitjet për takimin SHBA – Rusi do të fillojnë të enjten. Ndërkohë zëdhënësja e Shtëpisë së Bardhë tha se Rusia duket se po vazhdon përgatitjet për një sulm në shkallë të gjerë mbi Ukrainën.
Ajo shtoi se Shtetet e Bashkuara janë gjithmonë të gatshme të imponojnë sanksione të shpejta dhe të rënda nëse Rusia zgjedh luftën./Opinion.al
