Në studion e “Opinion” në Tv Klan, rikthehet në fokus një nga episodet më të errët dhe tronditës të historisë së Kolumbisë, sulmi brutal ndaj Pallatit të Drejtësisë më 6 nëntor 1985, “orkestruar” nga Pablo Escobar.
Ishte një ditë që ndryshoi fatin e drejtësisë kolumbiane, kur një sulm i përgjakshëm vrau 12 gjyqtarë të Gjykatës së Lartë dhe zhduku dosjet kyçe që do të mund ta çonin baronin e drogës në një ekstradim të pashmangshëm drejt SHBA-ve.
Gazetarja Fatjona Mejdini thekson se ishte pikërisht kjo marrëveshje për ekstradimin që ndezi alarmin tek Escobar. Escobar nuk e ndërmori vetë sulmin, por pagoi grupin gueril M-19 për të sulmuar në emër të tij, një manovër e ftohtë mafioze për të qëndruar jashtë skemës, por me kontroll total mbi rezultatin. Gazetari Blendi Fevziu nënvizon se qëllimi ishte i qartë, shkatërrimi i çdo prove ligjore që mund të çonte në ekstradim.
Në thelb të gjithë këtij makthi që përfshiu një komb, fshihej një frikë e vetme, të mos përfundonte në duart e drejtësisë amerikane. Dhe për këtë, Escobar ishte i gatshëm të shpërthente një luftë tw përgjakshme. Sepse për të, ekstradimi nuk ishte opsion, ishte fundi.
Fatjona Mejdini: Gjykata në Kolumbi kërkonte që të aprovonte marrëveshjen e ekstradimit me SHBA-të, që do të ishte fundi i Escobar dhe ekstradimi i tij në SHBA.
Blendi Fevziu: Ai shkoi dhe shkatërroi që të gjitha dosjet, që të mos kishte element për ta ekstraduar.
Artan Hoxha: Ai vrau 12 gjyqtarë, gjysmën e gjyqtarëve. Ai në momentin që nuk hyri në politikë, ai u çoi një mesazh shtetit kolumbian dhe drejtësisë kolumbiane. Ai bëri një marrëveshje dhe pagoi M-19, i pagoi për ta bërë këtë sulm, për të qëndruar vetë jashtë skemës. Ndërkohë që ai kishte hyrë në parlament në vitin 1982 dhe në vitin 1984 është tërhequr nga politika. Por, ai ndjeu rrezikun që do të vinte nga sulmi politik, sepse ai hyri në politikë për të mbrojtur biznesin. Në nuk mund ta rrisim dhe ta mbrojmë biznesin për qenë vetë në politikë, në qeveri. Ideja e tij ishte që mafia të kishte shtetin e vet dhe kjo është një gjë që ka ndodhur edhe në vende europiane. Por, mënyra se si kërkoi që të hynte dhe fakti që aty SHBA-të kishin hyrë fuqishme, ishin pengesat që e ndaluan atë. Në këtë sulm që bëri në Gjykatën e Lartë në fakt e detyroi qeverinë kolumbianë që të pengonte ekstradimin. Pra të anulonte marrëveshjen që kishte me SHBA-të për ekstradimet. Pas këtij sulmi Gjykata e Lartë u mblodh dhe mori vendimin që të pengonte ekstradimin.
Blendi Fevziu: Sepse ai shpërtheu një fushatë terrori në të gjithë Kolumbinë.
Fatjona Mejdini: Ka një moto sa i takon çështjes së ekstradimit. Escobar thoshte ‘më mirë një varr në Kolumbi, se sa një qeli në Amerikë’. Ekstradimi ishte një çështje që ai nuk e diskutonte dhe ishte një çështje që ai i druhej akoma më shumë. Edhe fushata e tij e terrorit në fund të viteve ’80 u udhëhoq nga frika e ekstradimit. Ai detyroi qeverinë që të negocionte për mos e ekstraduar.
