Një 30-vjeçar është kapur në Pikën Kufitare Kapshticë me 15 580 euro, të cilat nuk i kishte deklaruar në kufi, siç e përcakton ligji. Policia bën me dije se L. S., 30 vjeç po i transportonte paratë teksa po përpiqej të kalonte drejt Greqisë me autobus.
30-vjeçari është proceduar penalisht, ndërsa shuma e eurove u sekuestrua në cilësinë e provës materiale.
“Shërbimet e Stacionit të Policisë Kufitare Kapshticë, në bashkëpunim me FRONTEX-in dhe autoritetet doganore, në vijim të punës për parandalimin dhe goditjen e paligjshmërisë, në kuadër të kontrolleve të shtuara, në dalje të Republikës së Shqipërisë, gjatë kontrollit të imtësishëm, në valixhet e shtetasit L. S., 30 vjeç (pasagjer në një autobus), banues në Manëz, Durrës, gjetën 15 580 euro, të cilat ai nuk i kishte deklaruar në kufi, siç e përcakton ligji. Shuma e eurove u sekuestrua në cilësinë e provës materiale. Veprimet e mëtejshme procedurale u kryen nga strukturat hetimore të DVP Korçë, të cilat referuan materialet në Prokurori dhe filloi procedimi penal për 30-vjeçarin”-njofton policia.
Materialet i kaluan Prokurorisë pranë Gjykatës së Shkallës së Parë Korçë.
