Një 32-vjeçar është arrestuar nga policia pasi i maskuar së bashku me një tjetër person nën kërcënimin e armës kanë vjedhur paratë në një zyrë të një firme ndërtimi.
Mësohet se në pranga ka rënë Saldjon Çela, ndërsa është shpallur në kërkim bashkëpunëtori i tij.
Policia bën me dije Çela, është një emër i njohur për drejtësinë, me precedent të theksuar penal, për vjedhje.
Nga hetimet ka rezultuar se ai në bashkëpunim me një shtetas tjetër, në orët e para të mëngjesit të djeshëm, të maskuar dhe duke kërcënuar me një arme zjarri kallashnikov, kanë marrë një shumë parash, në zyrën e një firme private ndërtimi, në fshatin Dukat i Ri dhe më pas janë larguar me automjet.
Vijon puna intensive për identifikimin dhe kapjen e bashkëpuntorit.
Në cilësinë e provës materiale janë sekuestruar automjeti që dyshohet se është përdorur gjatë kryerjes së këtij krimi, si dhe një celular.
Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme.
