Shoferi i Edmond Koçit ka qenë dëshmitar në skenën e vrasjes së 43-vjeçarit mëngjesin e së shtunës në Durres. Sipas dëshmisë që ai ka dhënë për grupin hetimor, atentatorët kanë qenë me maska dhe shall.
“Nuk i kisha parë më parë dhe nuk i njoh kush ishin. Unë kisha pak kohë shofer i Mondit. Sot në mëngjes pranë shtëpisë së babait të Mondit na preu rrugën një makinë e zezë Benz. Ata ishin të maskuar me kapuça dhe shall…Unë dola menjëherë nga makina dhe ika me vrap tek rrugica ngjitur që është aty ku kishim ndaluar. Po të kisha qëndruar do më kishin vrarë edhe mua. Unë nuk di kush ka pasur konflikt me Mondin”, ka rrëfyer shoferi.
Edmond Koçi u qëllua për vdekje mëngjesin e sotëm në lagjen Nr 16 në qytetin e Durrësit, brenda automjetit me të cilin udhëtonte. Pak minuta më pas në Sukth u gjet një makinë e djegur dhe brenda saj një armë automatike. Koçi njihej edhe me epitetin Mond Çekiçi dhe ka qenë anëtar i bandës së Durrësit./Opinion.al
