Një 17-vjeçar është arrestuar nga policia në Kukës pasi lëvizte me armë zjarri, tip kallashnikov me vete.
Mësohet se policia ka sekuestruar armën e zjarrit kallashnikov dhe fishekët luftarak.
Sipas uniformave blu, bazuar në informacionet e siguruara nga qytetarët se një adoleshent qarkullonte me armë zjarri, është organizuar punën për lokalizimin dhe kapjen e tij.
Adoleshenti është konstatuar duke ecur në drejtim të fshatit Shishtavec. Menjëherë ka ardhur edhe ndërhyrja e policisë e cila ka bërë arrestimin e shtetasit të mitur B.P., 17 vjeç, i cili mbante me vete një armë zjarri kallashnikov me karikator me fishekë.
Materialet hetimore u referuan në Prokurorinë e Rrethit Gjyqësor Kukës, për veprime të mëtejshme, për veprën penale “Armëmbajtje pa leje”./Opinion.al
