Një 18-vjeçare me shtetësi italiane, ka deklaruar se është përdhunuar nga një 26-vjeçar shqiptar në orët e para të mëngjesit të 5 shtatorit, në një zonë plazhi përballë një hoteli në lagjen nr. 13 të qytetit të Durrësit.
Në dëshminë e saj, e dhënë në prani të një psikologeje dhe oficerëve të policisë, vajza ka rrëfyer:
“Gjatë natës kemi qenë me shoqërinë dhe kemi konsumuar edhe alkool. Për një çast unë jam larguar prej grupit dhe jam ulur në një shezlong që gjendej disa metra larg hotelit. Kjo ka ndodhur rreth orës 05:30 afërsisht të mëngjesit të 5 shtatorit. Gjatë kësaj kohe më është afruar një person i cili më ka sulmuar dhe me gjithë tentativat e mia për t’u mbrojtur, më ka përdhunuar pas rezistencës time. Më pas ai është larguar. Unë erdha te juve për të bërë kallëzim lidhur me këtë ngjarje”.
Raportohet se vajza ka shfaqur edhe shenja të dukshme lëndimesh, të cilat janë dokumentuar nga mjekësia ligjore, ndërkohë që Leonardo Preza, 26 vjeç, me precedent penalë për vepra të mëparshme si armëmbajtje pa leje dhe vjedhje, u arrestua në flagrancë pas identifikimit nga policia.
Në dëshminë e tij, Preza ka pohuar se ka kryer marrëdhënie me vajzën, por sipas tij gjithçka ka qenë konsensuale.
