Ky portret zyrtar i Donald Trump që ndodhet në ambientet publike të ndërtesës së Kongresit të shtetit federal të Kolorados e ka inatosur jashtë mase shefin e Shtëpisë së Bardhë. Në një postim në rrjetin personal social Truth, Trump e konsideroi atë, më të keqin që ka parë ndonjëherë.
“Askujt nuk i pëlqen ta pikturojnë keq, por kjo e Koloradoës, në Kapitolin e këtij shteti, e vendosur nga guvernatori sëbashku me të gjithë presidentët e tjerë, u deformua qëllimisht në një nivel që unë nuk e kisha parë kurrë. I njëjti artist ka pikturuar edhe presidentin Obama, i cili duket i mrekullueshëm. Ai që më ka bërë mua është vërtetë më i keqi”, tha Trump.
Presidenti amerikan akuzoi guvernatorin e Kolorados, Jared Polis se e ka vënë me qëllim këtë portret, sipas tij “të shëmtuar”. Trump e quajti “radikal të majtë” Polisin, i cili vjen nga radhët e demokratëve. Ndër të tjera, në koment Trump e vlerëson atë si të dobët në ushtrimin e detyrës, veçanërisht me kriminalitetin në këtë shtet federal.
