Themeluesi i “Amazon”, Jeff Bezos, ka akuzuar revistën amerikane “National Enquirer”, se janë përpjekur ta shantazhojnë atë me disa foto e mesazhe intime.
Kujtojmë se vetëm një muaj më parë njeriu më i pasur në botë u nda nga bashkëshortja e tij. Pak orë pas ndarjes revista publikoi detaje, dhe mesazhe private të një marrëdhënieje jashtëmartesore të miliarderit me ish-moderatoren Lauren Sanchez.
Bezos publikoi një “e-mail” që i është dërguar ndërmjetësve të tij, e ku kërcënohet se do t’i publikojnë “foto intime” me të dashurën. Miliarderi, gjithashtu pronar i gazetës “Washington Post”, tha se kërkohet prej tij të bëjë një deklaratë publike false, ku të pohojë se disa publikime të tij në gazetë nuk janë të motivuara politikisht e nuk kanë baza.
“Në vend që të kapitulloja përballë shantazhit dhe grabitjes, vendosa të publikoj ekzaktësisht çfarë më kanë dërguar, pavarësisht kostove personale dhe sikletit që më kërcënohet prej tyre”, shkruan Bezos.
Më herët në blogun e tij, Bezos kishte përmendur lidhjet mes revistës dhe presidentit Donald Trump.
Bezos ishte shprehur se gazeta “Washington Post” i ka krijuar atij armiqësi me njerëz të fuqishëm, përfshi presidentin Trump, i cili është mik i pronarit të revistës David Pecker./E.M
