Një grup të rinjsh janë konstatuar se lëviznin të armatosur rrugëve të zonës bregdetare të Dhermit. Policia tha se në pranga është vendosur Rei Vrapi, 21 vjeç, banues në Vlorë, pasi iu gjet pistoletë TT me 7 fishekë.
“Shërbimet e Policisë në Dhërmi , kanë marrë informacion se një i ri po lëviste me armë zjarri me vete, si pasagjer në një automjet BMW X5. Policia menjëherë ka organizuar punën, ku rreth orës 23.00, në fshatin Dhërmi, bashkia Himarë, në lagjen “Gjilek”, është konstatuar mjeti që dyshohej se lëviste personi që kishte armë me vete.
Gjatë kontrollit fizik të bërë shtetasit Rei Vrapi, 21 vjeç, banues në Vlorë, Policia i gjeti dhe sekuestroi në cilësinë materiale një armë zjarri e markës TT me një kreher me 7 fishekë. Ky shtetas ishte duke udhëtuar si pasagjer në automjetin e markës BMW X5 me pronar shtetasin R.S., 22 vjeç, banues në Vlorë. Në automjet udhëtonin edhe 3 persona të tjerë, të cilët së bashku me automjetin janë shoqëruar në ambientet e Komisariatit të Policisë Himarë për veprime të mëtejshme hetimore. Në përfundim të veprimeve të para hetimore të kryera nga Specialistët për Hetimin e Krimit në Komisariatin e Policisë Himarë, u bë arrestmi në flagrancë i shtetasit Rei Vrapi, për veprën penale “Prodhimi dhe mbajtja pa leje e armëve luftarake dhe municoinit”, ndërsa personat e tjerë janë lënë të lirë. Materialet i kaluan Prokurorisë për veprime të mëtejshme”, thuhet në njoftimin zyrtar.
Po kaq gjatë mbrëmjes së të shtunës ka ndodhur një incident në lokalin Havana në Dhermi, ku një person ka qëlluar me armë por për fat pa viktima. Policia tha se dy ngjarjet nuk kanë lidhje me njëra-tjetren.
/Opinion.al
