Patrulla e policisë rrugore gjatë një aksioni të premten në darkë në autostradën Durrës-Tiranë, i ka bërë me shenjë një drejtuesi mjeti për të ndaluar, por ai ka thyer urdhërin dhe ka vazhduar me shpejtësi skëterrë rrugën.
Policia tha se drejtuesi i mjetit Audi V8 me një shpejtësi 213 km/orë, ka refuzuar t’i ndalojë patrullës së parë, por është ndalur tek sheshi ‘Shqiponja’ në Laprakë, pasi patrulla tjetër e policisë i ka zënë rrugën.
Shoferi i pyetur se për çfarë arsye nuk respektoi urdhërin e patrullës së policisë, ai është shprehur se nxitonte, ndërsa e priste shoqëria për të festuar në fundjavë.
Mësohet se gjatë natës, Policia Rrugore, ka kapur mat shumë drejtues me shpejtësi skëterrë në autostradë deri në 213 km/orë.
“Në orët e para të mëngjesit janë evidentuar nga Radari drejtues mjetesh që qarkullojnë me shpejtësi tej normave të lejuara”- njofton policia.
Policia u bën thirrje gjithë drejtuesve të mjeteve, argëtohuni në fundjavë, por mos rrezikoni jetën tuaj dhe të përdoruesve të tjerë të rrugës.
