Në Pogradec u ndërpre përkohësisht operacioni për kërkimin dhe nxjerrjen e trupit të peshkatarit të mbytur dje në rezervuarin e Bradomirës.
Ekipi i polumbarëve, e ka pasur të pamundur të vijojë kërkimet, për shkak të temperaturave ekstremisht të ulta të ujit të rezervuarit.
Polumbarët po diskutojnë mundësinë e alternativave të tjera që do të bëjnë të mundur gjetjen e trupit të Ramazan Kojtarit.
Mendohet që trupi i viktimës të jetë në thellësi të rezervuarit, në një distancë rreth 50 m nga bregu, në vendin ku u gjet varka dhe trupi i peshkatarit tjetër. Familjarët e Kojtarit kanë bërë apel për nxjerrjen sa me parë të trupit të viktimës.
Dy peshkatarët, 50-vjeçari Arben Pupa dhe 56-vjeçari Ramazan Kojtari u mbytën në rezervuar pasditen e së dielës. Banorët e zonës arritën të nxirrnin nga uji trupin e Arben Pupës, ndërsa mbetet ende i pagjetur viktima e dytë.
