Ministrja e Arsimit Evis Kushi është pyetur nga gazetarët për mbylljen e shkollave dhe nëse ato do të mbyllen sa herë të bëjë ftohtë?
Kushi u shpreh se nga nesër nxënësit dhe mësuesit do të kthehen në shkolla dhe tha se mbyllja e tyre nuk u bë vetëm në Shqipëri, por edhe në Greqi, Turqi apo vende të tjera më të zhvilluara.
Sipas saj, arsyeja e mbylljes së shkollave nuk ishte vetëm mungesa e sistemit të ngrohjes por edhe fakti se ministria e Arsimit mban përgjegjësi për nxënësit edhe kur ata hasen me ngrica apo reshje gjatë rrugës.
“Lajmi i mirë është që nesër të gjithë nxënësit dhe mësuesit do të rikthehen në shkolla, pasi sipas parashikimit të motit do të ketë një përmirësim të temperaturave. Ne të gjithë e pamë që temperaturat ishin jo të zakonshme për një vend si Shqipëria. Në qytete të ndryshme temperaturat kanë zbritur në -10 gradë C, ndërsa në Veri të vendit apo Juglindje kanë qenë -17 gradë C. Kjo nuk një gjë që ndodh vetëm në Shqipëri, ju jeni informuar se edhe Greqia, të hënën, i mbylli shkollat për shkak të temperaturave të ulëta. Turqia ka bërë të njëjtën gjë dhe shumë shtete të tjera që janë më të zhvilluara e që i kanë shkollat e rrugët në kushte më të mira. Arsyeja nuk ka qenë vetëm problematika e ngrohja në shkolla, por ne duhet të kujdesemi dhe kemi përgjegjësi për nxënësit që në momentin kur dalin nga shtëpia, edhe nëse ka ngrica përgjatë në rrugëve apo reshje ne duhet të marri masat”,-tha Kushi./Opinion.al
